人名

人名，佢係用來區別個人嗰獨立性、家族歸屬箇個排他差異性嗰一種特別語言。箇下，受到殖民時代嗰影響同到全球化嗰趨勢，人名都係為到表示個人的特異獨立性。但係箇隻地方嗰風俗文化都伓同，咁也就有滴子人名冇屬於箇隻人名體系。

概論

漢字文化圈裡頭嗰「姓」同到「氏」，先頭不係同一隻概念，但今下都拕混同嘍。

用嘚人名嗰時間都係兩隻人相互碰頭、交流嗰場化，一隻人對另一隻人打招呼咁叫嗰時間嗰場合語言。戶口登記正後，一隻人的正式嗰名字（本名）就舞正嘍。但係，特定嗰場化哈可以用滴子綽號、敬稱、慣名。先頭，一隻人嗰名字都同佢嗰精神人格連嘚一起，特定嗰場化會有禁話本名嗰傳統，像「避諱」、「謚號」咁滴子文化習慣。箇下子，箇滴子傳統基本上都淡化、掟吥嘍。

名字係一隻人個人嗰主要屬性嗰表現形式，係佢用聲氣對自簡嗰嗰記載。有滴子時間，一隻人格名字能用得正外國嗰文字表示，但箇都只係佢名字嗰一種附從表示。

一隻嗰名字嗰讀法會有不同嗰方式。發音嗰變化基本都係屬於容許嗰範圍裡頭。像「黃平」嗰發音可以係[uong piang]、[uong pin]、[fong piang]、[fong pin]。箇裡頭[uong piang]係最道地嗰話法。但有滴子名字嗰發音就蠻難用佢嗰白讀音，像「郭富城」，大多時間都係都[kok fu cin]，不係[kok fu sang]。

一隻人同佢嗰名字係息息相關嗰。史前時代嗰人就跟自簡開始取名字嘍。中國嗰周朝以降、家族嗰「姓」、「氏」制度最終確立。古希臘嗰氏族、家族都有自簡嗰姓氏傳統。近代社會之前，世界各地嗰細伢子時常都冇自簡嗰名字。但到1989年，聯合國大會頒布兒童嗰權利嗰條約，裡頭嗰第7條第1項話「細伢子等出生嗰時間要直接登記佢嗰名字」、「細伢子，生下來就擁有有自家名字嗰權利」（shall have the right from birth to a name）。

結構、使用

大部分嗰亞洲國家、同到蠻多嗰非洲國家跟歐洲嗰匈牙利，一隻人嗰「名」（given name）都係位到「姓」（family name）嗰後頭，箇就跟大部分嗰西方國家相反。拿箇時間嗰一隻名字比較，像「李豆羅」，佢嗰名字就係「李」（家族名）+「豆羅」（個人名）組合正嗰。

構成要素

一隻人名嗰構成要素嗰數量，不同嗰文化裡頭有不一樣嗰習慣。美洲大陸嗰原住民，傳統上就光使用自簡嗰名字。也有像沙特阿拉伯樣嗰，公公許代嗰名字都接得使用、咁一隻人名就有4隻部分組成。哈有像巴西樣嗰，人嗰姓都哈冇普及開。

不同嗰文化裡頭，爺娘同到崽女嗰人名嗰關係也不一樣。日本有「純一郎、純也嗰崽、又次郎嗰孫」咁嗰名字，印度哈有「又三郎、又次郎嗰爺」咁嗰形式。

組成結構

人名嗰構成要素嗰順序，不同嗰、民族、文化裡頭也差好大嗰事。西方嗰國家，日常嗰文件、交流嗰時間都係拿「名」擺嘚「姓」嗰牽頭，嚴格嗰文件也會您轉箇隻順序。亞洲嗰國家大多數都係「姓→名」嗰順序。咁叫一隻人嗰名字之前，硬要舞清楚人家嗰人名習慣起。

有時間，人名嗰一部分係可以省吥嗰，像英語國家嗰middle name大多時間都係不話嗰。西班牙語國家，多部分組成嗰複姓也時常拕省吥去。

變換人名

基本上一隻人嗰名字都係佢爺娘幫佢取嗰。佢生下來之後，一般箇隻名字就會跟嘚佢一生，但有時間也係改得正名字嗰。

像，結婚或離婚嗰時間，老公老婆之間時常會改換一方嗰姓，咁就舞嘚佢俚嗰崽女也要跟嘚改姓。除吥婚姻嗰原因，一滴子德國人等佢俚洗禮嗰時間會得到一隻middle name，箇隻名字就會時常代替佢嗰教名（the Christian first name）。法國嗰《民法典》哈容許，要係一隻人嗰名字讀起來好難聽或好難念，佢也係換得正名字嗰。

多樣性

血統、民族嗰多樣性舞得人名到不同嗰文化裡頭都不一樣。

江西嗰頭三大姓係劉、李、陳。箇裡頭「劉」係江西第一大姓，有272.6萬人咁多。「李」係華人裡頭嗰第一大姓，「陳」係中國南方非常常見嗰一隻姓。

中國科學院調查嗰中國三大姓係李（7.4%）、王（7.2%）、張（6.8%），占得中國人口嗰20%有多。韓國嗰五大姓係金（김）、李（이）、朴（박）、崔（최）、鄭（정），佢俚占得韓國人口嗰55%許多。咁韓國有句俗話係「到首爾尋金先生」，意思係話「徒勞一場空」。越南光一隻「阮」（Nguyễn）姓就占得越南總人口嗰38.4%許多。日本人嗰姓有10萬-20萬許多。

江西嗰人名文化、歷史、制度

文天祥嗰署名

江西嗰人名文化

詳細嗰內容請參照江西嗰大姓

人名係一隻人嗰個人符號標誌，係隻超越時空嗰文化現象。每隻人名都係追述得正早以箇隻人嗰先祖嗰歷史符號。江西地處江南，上古史考證非常艱難。公元前一世紀，西漢到江西設置豫章郡，漢人咁開始遷入贛鄱大地。「漢姓」也就同時間拕引進。

《後漢書》、《三國志》登錄30喇隻江西人，《晉書》同到南朝四國史攏共錄到50喇隻人，佢俚都有介紹江西嗰本地豪門煬族，記載嗰地域也遍及贛北、贛南。《隋書·經籍志》錄入到江西嗰四部姓譜，佢俚係9卷《洪州諸姓譜》、8卷《吉州諸姓譜》、11卷《江州諸姓譜》、8卷《袁州諸姓譜》，箇都占到全志姓譜嗰一半。但各四部江西嗰早期姓氏文獻到元代嗰時間全拕跌吥嘍，佢俚嗰內容也就冇人曉得嘍。

先頭敦煌拕尋到過3份有關江西嗰唐代姓氏文書，像《新集天下姓望氏族譜》，裡頭列舉江西洪、饒、江、袁、虔五州嗰26隻姓望，時間跨度從東晉一徑到唐朝。末後唐、宋時期嗰林寶嗰《元和姓篆》、鄭樵嗰《通志·氏族略》、鄧名世嗰《古今姓氏書辨證》都介紹到江西嗰姓氏文化。宋朝以降嗰大姓類書，像《太平御覽》、《冊府元龜》、《文苑英華》都述及贛姓，歷史文人嗰筆記文集也都係江西嗰人名文化嗰參考文獻。

蒙元嗰時間，朝廷鼓勵漢人改叫蒙古名，故係1357年，河南行省平幸政事，《元史》話佢「其先江西人」，改叫「劉哈剌不花」。到明朝嗰時間，漢人胡姓拕官方禁止。《吾學編》話：「洪武元年二月，禁胡姓。」《日知錄·二字姓改一字》話：「洪武元年，禁不得胡姓者，禁中國人之更為胡姓」，箇裡顧炎武注「元時有此俗」。

清·雍正年間，南昌府嗰新建縣嗰熊峻運寫得《姓氏箋釋》，佢裡頭嗰內容不同《百家姓》咁嗰書體，佢嗰書搦全部嗰姓連嘚一起，或記事、或寫景、或描物、或抒情。像：「庸王家國，萬古隆昌。江山席鞏、諸夏平康。文習孔孟，武乜孫龐。伏農黃后、陶姚禹湯。周公封魯，管仲相恒。通鳥公冶，明經公羊。」箇係書起頭嗰48隻姓，話嗰係中國傳說裡頭嗰伏羲、神農、陶唐、夏禹，上古時代嗰商湯、周公、管仲、公冶長、公羊高箇滴子人。寫正書嗰時間係雍正年間，故係「雍」字排頭。

江西人都重視自簡嗰世系血統，咁編撰宗譜嗰時間時常有浮夸之辭。清·乾隆十二九年，江西巡撫輔德上疏話：「江西民人，有合族建祠之習。……所建府省祠堂，大率皆推原遠年君王將相一人，共為姓祖。如周姓則祖後稷，吳姓則祖泰伯，姜姓則祖太公望，袁姓則祖袁紹。」贛人之間非常作興「訪其同府、同省同姓，或聯絡於生童應考之時，或奔走於農民收割之後。百計勸捐，多方聳動。」咁都促進江西嗰宗族內部嗰和氣。故係許時間嗰張海珊到佢嗰《聚民論》裡頭話：「今者強宗大姓所在多有，山東、江西左右以及閩廣之間其俗尤重，聚居多或萬餘家，少亦數百家。」

『改姓』

「姓」記錄得家族嗰歷史，一般來話啷都係改不得嗰，但有時間哈有特例。像宋朝時間金姓係江西嗰一隻大姓，姓嗰人非常多，話係西漢金日磾嗰後人。南宋·高宗皇帝相到「金」字就會想到宋朝嗰死敵——金國，心裡頭作爆。咁佢就下令讓金氏族人搦姓都改做「淦」。

今下，江西嗰鄉下哈有咁嗰風俗：要係一隻人屋裡嗰細鬼時常病，佢爺娘就會搦佢抱到異姓鄰舍屋裡養，接到改鄰舍嗰姓。箇之後要係細鬼住到鄰舍屋裡，就叫佢嗰新命，要係佢住到自簡爺娘屋裡，就叫先頭嗰名字。

『堂聯』

堂聯係對家族嗰歷史嗰一隻概述，寫得好壞都係一隻人屋裡興榮境況嗰反映。袁州《南陽堂鄧氏重修族譜》話到家族嗰一封堂聯：「派分河北由汀州而潮州惠州袁州一脈流傳愈盛；祭舉冬至自始祖迄高祖曾祖顯祖千秋陟降攸臨」。箇對堂聯話清楚完個家族歌遷徙史起，接得有話明各代嗰先祖。箇就係贛地氏族嗰發展史嗰一隻縮版。

別嗰像萬載《張氏六支族譜》嗰堂聯：「忠厚近魯愚畢竟傳家在是；勤儉似艱苦須知奮進由斯」。九江《劉氏族譜》嗰堂聯：「士求名在勤農趨利在勤人生勤則不匱；子誠身以慎婦敬戒以慎家道慎罔不興」。箇滴子堂聯都洗勉勵子孫上進做人，曉得立身處世嗰行爲準則。

江西嗰人名歷史

梁洪生嗰《唐以前江西地方姓望考》（《歷史地理》第10輯）話明樓唐代之前江西由「四姓衣冠」發展到三十喇隻姓望嗰完個過程。江西嗰晉代望姓陶氏，佢搦家族名人陶侃同到陶潛列做唐代之前尋陽郡江州嗰兩隻世家大族（陶、翟），哈話陶潛嗰老婆翟氏也係箇隻大姓嗰後人。末后去哈引用《古今姓氏書辨證》，裡頭話：「陶姓……世望出丹陽。晉太尉侃之祖父同，同生丹，吳揚武將軍，柴桑侯，遂居其地。生侃……逸生彭澤令，贈光祿大夫潛……」。佢接得引用敦煌嗰唐寫本姓望氏族譜殘卷，裡頭話「尋陽郡之陶翟二姓」。

正史文獻裡頭記錄嗰第一隻江西人嗰名字係吳芮（？－前203年）。吳姓也係許時間江西、江蘇、安徽箇滴地方嗰大姓。末後姓吳嗰江西人哈有三國嗰吳遽、晉代嗰吳猛、吳應等。上猶有隻摩崖石刻，上頭寫嗰款識係「虞去虍」，咁就係暗話「吳」，箇都係今下江西年代最早嗰石刻題記。宋朝江西嗰吳姓係許時間最多嗰，占得宋朝吳姓總人口嗰13%，江西總人口嗰2.8%，係當時吳姓人口嗰聚集地。明朝時間，江西嗰吳姓人口增加到總人口嗰14.8%。今下佢係江西嗰第7大姓。

考古發現裡頭尋到西漢嗰兩隻古墓。一隻係宜春嗰白泥山古墓，裡頭嗰套棺底板有有「黃母」兩隻字。許時間係不作興女嗰嗰娘家姓嗰，故係「黃母」係話「黃氏之母」。另一隻古墓係南昌七里街張家山嗰「南昌民工都袁」墓。箇係一隻姓「袁」嗰人嗰墓。江西嗰方志裡頭記錄過東漢許時間嗰高士袁京，佢住嘚宜春，過身後也拕埋到宜春嗰山林裡頭，故係宜春嗰古名係「袁州」。

江西李氏老早就拕記錄到史書裡頭。《後漢書》就話到李淑，《三國志》嗰李玉等等。西晉鄱陽郡嗰李達係有資料嗰頭隻卒葬外境嗰江西人。江蘇嗰鎮江燕子山有「收鄱陽葛陽縣李達」磚地券。《梁書》哈記載哩梁朝大通年間，鄱陽郡嗰李、彭兩隻大姓「先因忿爭，遂相誣告」，末後爭鬥得結，「李睍等四百二十人詣闕拜表，陳襄德化」。箇係江西有資料嗰最早嗰宗姓爭鬥。

『豫章五大姓』

樂史嗰《太平寰宇記》裡頭話到許時間嗰江西五大姓，「豫章郡五姓，熊、羅、雷、諶、章」。

南昌尋到嗰一隻東吳古墓裡頭，銘磚有「吳永安六年八月熊西城葬」咁嗰字。墓主人嗰熊姓，也可以話係江西嗰千年第一大姓。東吳-兩晉嗰正史裡頭就有熊睦、熊鴻、熊遠、熊縉、熊鳴鵠、熊默箇多名人。聽話「熊」箇隻姓係楚人嗰舊姓。楚人嗰先祖季連，佢嗰後裔住到熊山，叫自簡「穴熊氏」，奉「熊」做圖騰。江西做為南楚之地，熊姓嗰人不斷繁衍，咁就一徑係江西歷史上嗰大姓。統計數據顯示宋朝嗰江西熊氏，占得宋朝熊氏嗰38%許多，江西、福建、湖南三地嗰熊氏更假占到82%。明朝嗰江西熊氏一下猛增到明朝熊氏人口嗰46%。

《江西羅氏大成譜》話：「羅族出豫章西山」。西漢做嗰豫章城，就係大將羅珠嗰守城興建做正嗰。末後羅珠全家遷到城內居住落籍。羅姓到江西繁盛后，一徑到宋朝都係江西嗰望姓。宋朝嗰時間，江西嗰羅姓就係第一多，占得宋朝嗰羅姓總人口嗰38.8%，江西總人口嗰1.6%。許時間江西、四川、安徽、湖南四隻地方嗰羅姓總人數係宋朝羅姓人口嗰70%。明朝時間，江西嗰羅姓哈係第一多，占到明朝嗰羅姓人口嗰29.4%。箇下，羅姓嗰堂號哈係叫「豫章堂」，堂聯係「詩耽鄭女，曲感趙王」。

「雷」係江西到晉朝時間好有名嗰姓之一。江西嗰雷姓係漢代遷入嗰，雷義係江西雷氏嗰第一人。末後晉朝嗰雷煥、南朝嗰雷次宗爺崽都係許時間嗰名士。敦煌嗰姓氏文書同到樂史嗰《太平寰宇記》話到「豫章五姓」，裡頭都有「雷」姓。永修嗰晉代墓磚上頭也有「雷天有」嗰銘文。宋代嗰時間雷姓係集中到陜甘、江西兩隻地方。明朝江西嗰雷姓人口占到同姓全部人口嗰30%，係明朝嗰全國第一多。中國南方嗰一部分雷氏係上古南蠻民族嗰後人，佢哈係今下嗰贛閩浙嗰畬民嗰四大姓之一。

西漢嗰末年，湛姓遷到江西嗰塢土塘。東漢年間，大司農湛重遷佢屋裡到南昌，得朝廷「高第除郡博士」嗰稱號。咁湛姓一族到南昌一帶落地生花，形成望族，譙陽郡、豫章郡、南昌郡拕當做郡望。湛姓到東晉嗰時間開始壯大。《晉書·列女傳》話「陶侃母湛氏，豫章新淦人也」。箇時間嗰「湛」姓都係「氵」邊，箇拕今下嗰考古出土嗰文物證明嘍，末後到唐宋就變做「言」邊（諶）。佢嗰讀音係「甚」嗰音。隋唐嗰時間，江西嗰湛姓族人哈聚住到許時間嗰新淦，地方都叫「湛溪鎮」。

有話法話「豫章」係「章」姓嗰誕生地。秦末將軍章平拕韓信捉到，赦免後住到豫章，繁衍後代。西漢時間嗰章文拕話做係姜太公嗰後人。晉末中原大亂，章姓嗰一族到豫章發展成郡望，南北朝時間好有名嗰吳興章氏就係佢嗰分衍。而今江西、浙江、湖北三地嗰章姓人係中國同類人口嗰64%。

**宋朝時間嗰江西嗰頭十隻姓**
姓	佔江西人口嗰比例	到江西嗰排名	佔中國人口嗰比例	到中國嗰排名
劉	7.58%	1	17%	1
王	6.00%	2		6
李	5.63%	3	8.2%	6
陳	5.39%	4		2
黃	4.09%	5	27.5%	1
趙	3.69%	6	6.8%	6
曾	3.61%	7	57%	1
胡	3.57%	8	29%	1
張	3.00%	9		10
吳	2.84%	10	13%	1

江西嗰宗族

「義門」係話江西本地嗰大家族。佢俚嗰家族人口眾多、廣有田產、家法嚴明，典型嗰像德安嗰陳氏一族。胡旦嗰《義門記》話佢屋裡到公元1000年嗰時間，全家有2478隻人，每年秋糧租米有4000多斛，光係搦到家族私有嗰東佳書院嗰田就搦嘍20頃。德安陳氏由唐·僖宗皇帝以降，一徑受歷代朝廷嗰封賞同到嘉獎。南唐「敕賜義門陳氏」，「蠲其沿徵科役」。公元890年，陳崇頒布《義門家法三十三條》，規整家族嗰門風。宋·太宗皇帝免吥陳氏一族「本戶沿徵雜配」，哈「令歲貸官米二千石」。真宗皇帝賜聯，話陳氏屋裡「萃居三千口人間第一，合爨四百年天下無雙」。末後仁宗皇帝哈賜匾「忠孝世家」，極盡哀榮。

末後宋皇怫陳氏家族會做威一方，到公元1062年7月初三，江南西路轉運使謝景初帶人奉旨拆分陳氏一族。第年3月議定方案，揸得禦賜嗰「知守宗希，公汝才思，彥承延繼」12隻派行分析做291隻莊園。箇291隻陳氏，末後移居中國各地，故係箇下好多陳姓祖祠哈掛得「義門世家」嗰牌匾，咁也就係「天下陳氏出義門」嗰話法嗰由來。1212年2月14號，家族裡頭嗰進士陳炎上書話：「自建炎以來，高祖至炎及孫，委實七代同居，有一百餘口，自幼至長，不蓄私財，鄉里父老，眾所共知。乞加旌表，詔與特賜。旌表門閭，仍令長吏致禮。」咁德安陳氏分家後重新佮攏。

『門規』

1847年修正嗰《義門陳氏大成宗譜》嗰卷首收錄到「陳氏家法三十三條」。老早嗰《義門記》裡頭就話到「崇乃撰家法垂示將來。……立主事以專家政，置庫司以掌家財，立莊長以督賦租，勘司以序男女，院學以教童稚，道院以業焚修，巫師以備祈禱，醫司以供藥石，東佳書院以待學者，德安■■宇以奉公門。其餘酒醬鹽米之儲，中履笄箱之用，三時飲食之節，四時宴會之期，長幼出入之儀，晨婚定省之禮，婚疾吊葬，送往迎來，賞以勸善，罰以懲惡，凡諸纖細，忙不周詳。」

家法門規制定嗰目的係「恐將來昆雲漸眾，愚智不同，苟無敦睦之方，慮乘負荷之理」，要係一家人屋裡兄弟鬩墻，家族時常就會咁敗吥嘍。故係為到避免家族破散嗰可能，家法頭先就要求每隻人「推功任能，懲惡勸善。公私出納之式，男婚女嫁之儀，蠶事衣妝貨財飲食，須令均等，務要和同，令子子孫孫無間言而守義範也」。

嚴明嗰家法限制每隻家族成員嗰個人慾望，所有人喫嘚一起，住嘚一起，做事也一起。屋裡全家人嗰經營管理係家族同到各莊客兩頭舞，錢財收支也係咁舞。驁鴷不聽話嗰人會拕專門嗰刑杖厅懲罰。

『族譜』

詳細嗰內容請參照江西嗰族譜

箇下江西留到嗰族譜，《中國家譜綜合目錄》裡頭攏共登錄到556冊，上海圖書館弆到526冊，箇滴子宗譜嗰宗族居住地分佈全贛，有51喇隻，佢俚都有鮮明嗰自身特點。像，民國三十二年（1943年）編正嗰木活字本《瑞金北關楊氏七修族譜》，佢四周係雙邊，冇世系圖，單只一隻西式世系表，族譜一冊嗰最督一頁嗰頁面係第冊嗰頭一頁，咁最督一側嗰最督一頁嗰頁碼就係完本族譜嗰總頁數。

別嗰文化嗰人名習慣

世界頭上特試研究各家文化裡頭嗰人名習慣嗰專門性、系統性、總括性嗰學術資料係非常少嗰。但係單單一文化裡頭，哈係尋得到一滴子佢自簡文化嗰特徵嗰信息材料。下頭就會話到各式各樣嗰文化嗰人名習慣。

東亞

漢語國家

漢人嗰名字都係「姓 + 名」組成嗰。一般來話一隻人嗰姓係佢爺傳嘚佢嗰，佢嗰名係一隻字到兩隻字組成嗰。

早已「姓」跟「氏」係不同嗰。像周代嗰王族姓「姫」，太公望呂尚嗰後代齊國公姓「姜」，秦始皇帝嗰皇族姓「嬴」，都係「女」旁，箇表示許時間嗰社會哈有母系氏族嗰跡。故係「姓」也係「女 + 生」組成。末後父系文化強盛，「姓」咁就隨嘚爺嘍。一隻「姓」嗰宗族自簡一徑繁衍，下頭不同嗰家庭就取「氏」，為到跟人家區分開。故係「氏」係「姓」下一級嗰概念。「姓」係得自起先居住嗰村落、歸屬嗰部落；「氏」係得自君王嗰封地、賞賜嗰爵位、擔任嗰官職或生平嗰功績。故係貴族係有姓、有名、有氏嗰；平民係有姓、有名、冇氏嗰。咁同「氏」嗰男女得正結婚，同「姓」嗰就結不正。

秦·始皇帝一統天下，同時間貫徹佢嗰「郡縣制」，咁周室嗰分封制度拕完全破壞。貴族冇有自簡嗰封土，象徵豪門士第嗰「氏」變得冇有意義，「姓」同得「氏」也跟嘚合并嘍。《日知錄·氏族》就話：「姓氏之稱，自太史公始混而為一。」

古時間一般人哈會有隻自簡嗰「字」。男仔子等20歲嗰時間舞過「冠禮」之後就會取字，女仔子舞過「及笄」或嫁人之後就會取字。「字」一般都同本人嗰名字有關，像杜甫字「子美」，「甫」係話男嗰好克氣；王維字「摩詰」，因為佢好歡喜佛士「維摩詰」。箇隻傳統一徑到箇下才少作興。

一隻人嗰中國式嗰完個姓名像：

格式	氏	行輩	名 / 字	性別
男嗰	稽	伯	羽	父

格式	夫家國名	行輩	本姓	名 / 字	性別
女嗰	虢	孟	姬	良	母

公元627年，唐·太宗朝嗰吏部尚書高士廉寫正《氏族志》，朝廷拿佢頒布天下。公元960年，好有影響力嗰《百家姓》寫正，裡頭攏共記錄408隻單姓、20隻複姓。北宋嗰皇姓「趙」拕擺到頭位。

漢字使用面積遼闊，各地嗰語言也差好多。故係一隻姓到不同嗰地方會有不一樣嗰發音，咁箇兮名字嗰羅馬拼音也就不相同嘍。

姓	贛語	粵語	閩語	日本語	韓國語	越南話	普通話
趙	Ceu	Ziu	Tiō	Chō	Jo	Triệu	Zhào
江	Gong	Gong	Kang	Kō	Gang	Giang	Jiāng
周	Jiu	Zau	Chiu	Shū	Ju	Chu	Zhōu
胡	Fu	Wu	Ô·	Ko	Ho	Hồ	Hú
郭	Gok	Gwok	Koeh	Kaku	Kwak	Quách	Guō
石	Sak	Sek	Chioh	Seki	Seok	Thạch	Shí
何	Ho	Ho	Hoe	Ka	Ha	Hà	Hé
謝	Shia	Ze	Chiā	Sha	Sa	Tạ	Xiè
鄧	Ten	Tang	Tēng	Tō	Deung	Đặng	Dèng
程	Cang	Cing	Thiâⁿ	Tei	Jeong	Trình	Chéng
王	Uong	Wong	Ong	Ō	Wang	Vương	Wáng
丁	Diang	Ding	Teng	Tei	Jeong	Đinh	Dīng

朝鮮語國家

朝鮮半島嗰五大姓。

　　金

　　李

　　朴

　　崔

　　鄭

朝鮮半島歷史上受到中國文化嗰好大影響，故係名字也都係由一隻字、兩隻字組成嗰。整隻半島姓金、李、朴、崔鄭嗰人非常多，箇五隻姓占韓國人口嗰54％嗰樣子。

統一新羅之前嗰朝鮮半島人嗰名字不係跟今下一樣嗰。許時間高句麗王朝末期嗰貴族「淵蓋蘇文」，今下嗰韓國話念[Yeon Gaesomun]，但係《日本書紀》裡頭佢嗰名字係「伊梨柯須彌」（Iri Kasumi），箇日語發音拕認為係許時間高句麗語嗰模擬。

統一新羅之後，朝鮮半島嗰人嗰名字都漢化嘍。「姓」基本上都係一隻字，也有「皇甫」二隻字嗰特別複姓。韓國人嗰同姓同籍貫（本貫，bon gwan）嗰意識濃厚，故係同姓同本貫嗰人結婚係不拕容許嗰。箇下，朝鮮半島裡頭嗰金海金氏係最多人嗰（本貫係釜山廣域市附近嗰金海市）。族譜（족보，jok bo）係記錄先祖事跡嗰載體，但女仔子嗰名字係不登記嗰。李氏朝鮮嗰黨爭激烈嗰時間，族譜開始投入使用。一般族譜裡頭對始祖嗰記載都係依據傳說，故係古人嗰偉跡顯得多傷嘍，可信性也跟嘚降低。

要係名字係兩隻漢字，同族同代嗰男仔子會有共有嗰字，箇係位到表示世代間嗰差別順序。箇類字拕叫做「行列字」，佢係由陰陽五行說規定嗰，即「木、火、土、金、水」。像某代嗰人嗰行列字係「木」（根、桓），佢俚嗰下代就係「火」（煥、榮），下下代係「土」（圭、在）……咁一徑接嘚下去。哈有使用天干嗰，十干係「甲、乙、丙、丁、戊、己、庚、辛、壬、癸」；十二支係「子、丑、寅、卯、辰、巳、午、未、申、酉、戌、亥」。

箇下，有滴子人嗰名字係用純朝鮮諺文記錄嗰，箇係因為漢字記錄不正朝鮮自簡嗰固有語。

日本

一隻典型嗰日本名——山田太郎

日本嗰人名基本上都係漢字寫正嗰，用假名（仮名）寫嗰名字係冇有含義嗰。箇下一滴子女仔子講究個性，佢俚多歡喜用假名去取名字。

日本人嗰姓有十多萬隻姓。箇係因為日本明治維新後，國家要求所有人揀隻自簡嗰姓，咁冇幾年就一下多出8萬多隻姓，松下、井上、田中箇類典型嗰姓係許時間嗰人根據居所位置舞出來嗰。日本話裡頭嗰漢字有幾喇種發音，咁介紹一隻人嗰名字到人家，必須要搦假名注音才做得，像人名裡頭有「一」字，佢嗰讀音可以係hajime、hitoshi、ichi、kazu。同樣嗰hajime箇隻音，佢嗰人名用字可以係一、始、治、初、元、肇、創、甫、基、哉、啓、本、源、東、大、孟、祝。日本嗰姓嗰字數不定，多嗰可以到5隻字：

一隻字：東、西、南、北、辻、森、林、谷、原、岡、堺…
兩隻字：佐藤、鈴木、田中、山本、高橋、中村、渡辺、小林、原田…
三隻字：長谷川、佐々木、五十嵐、久保田、佐久間、小笠原、大久保、小野寺、波多野…
四隻字：勅使河原（勅使川原）、小比類巻、長宗（曽）我部…
五隻字：勘解由小路、左衛門三郎、正親町三条…

日本嗰皇室家族係冇有姓嗰。

蒙古

蒙古人歡喜取講緣分、帶佛性嗰詞做細伢子嗰名字。蒙古冇有「姓」嗰傳統，故係個人嗰部落名可以當「姓」來用。時常看到嗰名字都係跟性別有關嗰。男仔子嗰常見名有Tömörbaatar（鐵英雄）、Chuluunbold（石金剛）、Batsaikhan（強健美），女仔子嗰常見名有Altantsetseg（金花）、Sarangerel（月光）、Erdenetungalag（玉珍珠）。成吉思（Chingis）、忽必烈（Khubilai）箇類蒙古古代英雄嗰名字箇下哈係用嘚。

蒙古人哈歡喜用藏傳佛教嗰名字，Dorjpalam係話「寶石」、Ochir或Bazar係話「金剛」。

蒙古嗰爺娘也會幫自簡嗰細鬼取「賤名」，覺得咁會讓妖魔鬼怪少惹自簡嗰細伢子。Muunokhoi係話「惡狗」、Nergüi係話「冇名」、Terbish係話「不係許隻」……

蒙古變做蘇聯嗰衛星國嗰時間，有滴子哈會取俄國名，像Alexander、Sasha等等。

越南

屬於漢字文化圈嗰越南，佢嗰人名文化同中國都係差不大嗰。姓都係一隻字，少數係兩隻字；名係一隻字或兩隻字，少數三隻字。

「阮」（Nguyễn）係越南第一大姓，占越南人口嗰38.4%許多。盈下來嗰大姓哈有「陳」（Trần，11%）、「黎」（Lê，9.5%）、「范」（Phạm，7.1%）、「黃」（Huỳnh / Hoàng，5.1%）。

名字嗰頭隻字叫tên đệm（中間嗰名），後頭嗰名字做為稱呼，係經常使用嗰。像呉廷琰（Ngô Đình Diệm），佢嗰政府就係「琰政府」，而不係「吳政府」。除吥一滴子非常有名嗰人物，像胡志明（Hồ Chí Minh），就會叫佢Uncle Hồ，不係Uncle Minh。

早已嗰中間名都冇幾多嗰選擇空間。男嗰大部分係Văn（文），女嗰大部分係Thị（氏）。箇下更多嗰中間名拕發展出來，男仔子嗰中間名就主要有Văn、Hữu、Đức、Công、Quang箇滴子。

南亞

中南半島

傳統上，中南半島裡頭除吥越南，別嗰國家嗰人都係冇「姓」嗰。末後受到殖民帝國法國嗰影響，柬埔寨、老撾開始到名字嗰後頭加自簡屋裡爺嗰名字。緬甸哈冇有「姓」嗰傳統，必要嗰時間就拿爺娘嗰名字同自簡嗰名字連到一下用。

印尼

整個印尼人民系統也分得正下面呢4類：

齋一隻名、冇姓，好似係蘇加羅、蘇夏拖
兩個（或更多）名、冇姓，好似係蘇思羅班崩尢多約羅
兩個（或更多）名、有一個姓，好似係手亞督夏利·拿蘇巡、Liem Swie King（林水鏡）
兩個（或更多）名、有一個爺名，好似係梅加娃娣蘇加羅卜利

大部分印尼人都冇「姓」。通常印尼人會搦自簡嗰名字連到自簡爺嗰名字一下用。有滴子老婆哈會搦自簡老公嗰名字加到自簡嗰名字後頭。

馬來西亞

馬來西亞只有當地嗰華人會用「姓」。別嗰種族，都係自簡嗰本名接一隻爺名。

馬來族嗰人大部分都係揸阿拉伯人嗰取名傳統。像bin（阿拉伯話：بن）係話「某人嗰崽」，binti（阿拉伯話：بنت）係話「某人嗰女」。故係一隻叫Osman嗰人嗰崽Musa，佢嗰全名會係Musa bin Osman。但係bin跟binti都有簡化形式，或者可以完全省吥去。

菲律賓

菲律賓係隻基督教國家。故係佢嗰人名都係用得「名 + middle name + 姓」嗰西方姓氏。女嗰等結吥婚之後，就搦老公嗰姓做自簡嗰姓，先頭自簡嗰姓就做middle name。

大部分嗰菲律賓人都有西班牙語嗰名字，但蠻多嗰人也同時間有菲律賓本土嗰名字。箇下年輕人哈會有隻基督教嗰英文名。

印度

印度教裡頭，係可以通過一隻上層種姓（Caste）嗰人嗰系族（Gotra）曉得佢嗰血統門第嗰，佢嗰名字通常係佢父系血統裡頭最早嗰許隻人，像Atreya、Koundinya等等。有滴子人嗰名字可能係佢先祖嗰職業或者居住地。同系族嗰兩隻人係結婚不正嗰，一般會覺得佢俚係有親緣關係。

上層種姓人嗰姓大多得自佢俚先祖嗰居所、職務、敬稱、名號、部族。低滴子嗰種姓也係佢俚同種姓階層嗰職務、個人特徵，像Niogi就係話祖上有人當過王室嗰部，Vaideeki係話祖上有人從事宗教修煉。

印度存在種姓歧視，故係好多人一下揀隻共同嗰姓，像Kumar。等Kumar變得多傷嘍嗰時間，Ranjan、Anand又拕采用嘍。

西亞

以色列

詳細嗰內容請參照 en:Hebrew name 同 en:Jewish name

非常多嗰希伯萊名字都係出自希伯來語版嗰《聖經》。世界上嗰猶太教徒、基督教徒、甚至穆斯林都會用箇兮名字。希伯萊明細一般都會有特殊嗰含意、暗指，像Judah（יהודה，Yəhûḏāh）就係話歷史上有名嗰猶大。Reuben（ראובן，Rəʼûḇēn）係話「看，崽哩」。

希伯萊名字經常有隻詞綴，猶太人用得多嗰係יהו（-yāhû / -iyyāhû / -ayhû）同到יה（-yāh/-iyyāh），佢俚組成嗰常見名有ישׁעיהו（Yəšaʻªyāhû）、צדקיהו（Ṣiḏqiyyāhû）、שׂריה（Śərāyāh）。

波斯

20世紀初，勒者·闍（رضا شاه پهلوی，Rezā Shāh）當政之前，伊朗（古名「波斯」）人係冇有姓嗰。一隻人硬要到自簡嗰名字前頭、後頭加隻詞綴，咁才得跟人家區分開。有好多人嗰名字哈係佢自簡住嘚嗰地方加隻詞尾，像Tehrani（德黑蘭 + i）、Shirazi、Khorasani等等。

伊斯蘭占領波斯後，同時間也帶來嘍一滴子阿拉伯名字。信基督教嗰波斯人嗰阿拉伯名字同周邊阿拉伯國家嗰名字差不到好大嗰事，但也不會有「穆罕默德」咁典型嗰穆斯林名。佢俚會用波斯語轉寫基督教名。

伊斯蘭國家

俄托曼帝國嗰Mahmud II蘇丹嗰署名

阿拉伯人嗰傳統名字係由ism（اسم，某人嗰本名）、kunya（كنية，某人嗰爺娘）、nasab（نسب，某人嗰細鬼）、laqab（لقب，某人嗰尊稱、外號）、nisba（نسبة，某人嗰出身）箇滴子要素組成嗰。

『ism』

一隻阿拉伯人最主要嗰名字就係ism（اسم）。大多數阿拉伯名字都係阿拉伯話裡頭有一滴子意思嗰詞，時常係話一隻人嗰喫價嗰性格，像Karīm係話佢人大方，maħmūd係話佢值得表揚，箇兩隻詞都係日常中日日會話到嗰。

『kunya』

kunya（كنية）經常係一隻人嗰頭隻崽，佢經常替代ism，像Abu Kareem（أبو كريم）係話「Kareem嗰爺」，Umm Kareem（أم كريم）係話「Kareem嗰娘」。

『nasab』

nasab（نسب）係屬於父輩系統。佢用ibn/bin（ابن）表示一隻人嗰「崽」、bint表示一隻人嗰「女」。咁Ibn Khaldun（ابن خلدون）就係話「Khaldun嗰崽」。幾喇隻nasab連嘚一起就可以一下尋到早已佢嗰祖先嗰名字。到古阿拉伯嗰部落社會裡頭，箇對個人嗰身份、政治社會地位都係好重要嗰。

『laqab』

laqab（لقب）係對一隻人自身嗰描述。像一千零一夜裡頭嗰Abbasid Caliph Haroun al-Rashid，al-Rashid就係話「有德嗰人」。

『nisba』

nisba（نسبة）係一隻人嗰來源地、故居地，佢傳得正好幾代嗰人。像常見嗰名字al-miṣrī就係話「埃及來嗰」，叫箇隻名字嗰人都可能好幾代都冇住嘚埃及嘍。

故係，搦一隻名字嗰做比方：

阿拉伯語：ابو كريم محمد الجميل بن نضال بن عبد العزيز الفلسطيني

羅馬化：Abu Kareem Muhammad al-Jameel ibn Nidh'aal ibn Abdulazeez aal-Filisteeni

國際音標：ʼabū karīmi muḥammadu-l-jamīlu-bnu niḍāli-bni ʻabdi-l-ʻazīzi-l-filisṭīnī

箇隻名字就係話「卡林嗰爺、穆咸瑪德，克氣嗰、尼答嗰崽、阿都嗱茲嗰崽，巴勒斯坦人」。

歐洲

古羅馬

古羅馬嗰人名有三隻部分：名（praenomen，本人嗰名字）、氏（nomen，氏族嗰名字）、姓（cognomen，家族嗰名字）。男嗰哈有隻「號」（agnomen，後添嗰名字）多。箇隻人名形式一徑追溯得到公元前5世紀許早。末後佢嗰普及冇變快，到公元前125年出現首隻記錄，箇一百年後就咄真普及開。

『praenomen』

箇隻名字係爺娘揀嗰，通常係爺嗰責任。揀得正嗰範圍也限於Gaius、Gnaeus、Marcus、Quintus、Publius、Tiberius同到Titus箇滴子名字。故係一隻人嗰屋裡可能好幾代嗰人叫一隻名字，咁可以用「姓」、「號」區分開。一般來話，佮得來嗰朋友才會叫一隻人嗰「名」。

『nomen』

箇隻名字係一隻人佢氏族嗰名字，分陰陽性詞尾，男嗰係-ius，女嗰係-ia。先頭嗰氏族係話住嘚羅馬嗰人。末後羅馬帝國一徑擴張，別嗰部落也加進來，有滴子名字就有明顯嗰地理信息。有名嗰「氏」有 Aemilius、Claudius、Cornelius、Domitius、Julius、Junius、Pompeius、Antonius同到Valerius。

凱撒大帝嗰頭像，歷史上嗰佢係隻客頭

『cognomen』

箇隻名字出現嗰最晏，到公元前100年上下首回拕記錄到官方文件。「姓」經常係描述一隻人嗰表現、或挖苦佢都可能。凱撒大帝嗰「姓」（Caesar）係話一隻人嗰毛多傷嘍，但實際上凱撒大帝係隻客頭。

有滴子「姓」係源自「氏」，通常係-anus結尾。 Vespasian嗰「氏」係Flavius，箇也係佢爺嗰。佢嗰「姓」係Vespasianus，箇得自佢娘嗰Vespasia。

『agnomen』

箇隻名字係為到表述一隻人嗰本事成就。常見嗰「號」Pius就係話一隻人虔誠敬天、樂於奉獻。一般來往「號」係不拕繼承嗰。但有時間爺崽舞正一場事或性格一樣，崽箇時間許就會繼過佢爺嗰「號」，像Augustus、Germanicus咁嗰情況。

故係，搦一隻名字嗰做比方：

拉丁語：Marcus Aurelius Lucii f. Quinti n. tribu Galeria Antoninus Felix, domo Caesaraugusta

譯文：馬庫·俄勒琉·魯齊嗰崽·昆第嗰孫·加勒栗部落·顏托尼奴家族·拫運嗰人·住嘚舍拿哥舍嗰人

基督教國家

基督教國家之間嗰文化傳統、語言習俗都不同。但都歡喜用聖賢、天使嗰名字做自簡嗰名字。像，英語嗰Michael、法語嗰Michel、德語嗰Michael、西班牙語嗰Miguel、意大利語嗰Michele、瑞典語嗰Mikael、希臘語嗰Μιχάλης（Michalis）、俄羅斯語嗰Михаил（Mikhaïl）、阿拉伯語嗰ميكال‎（Mikâïl）都係出自希伯萊語嗰מיכאל（Mikha'el），係話「崇拜上帝」嗰一隻大天使。

別嗰宗教名哈有Thomas、Peter、David、Cyril、Samuel、Deborah、Isaac、John、Anthony、Catherine、Gabriel、Nicholas、Joachim、Mary、Joseph、Paul、Kevin等等。

斯拉夫國家

斯拉夫民族都係「名 + 爺名 + 姓」三隻部分組成嗰。爺名（Отчество）大多時間係一隻人屋裡嗰爺嗰名字嗰基礎。像蘇聯先頭嗰總統斯達林嗰全名係Светлана Иосифовна Сталина（Svetlana Iosifovna Stalina），到佢嗰名字裡頭就可以曉得佢爺嗰名字係Иосиф（Iosif）。下頭就搦隻俄語嗰名字做比方。

俄羅斯先頭嗰總統普京嗰全名係Владимир Владимирович Путин，拿迪密·拿迪米羅韋集·普京）。拿迪密（Владимир）係佢嗰名，拿迪米羅韋集（Владимирович）係佢嗰爺名，普京（Путин）係佢嗰姓。

俄羅斯人嗰名字大多係到東正教嗰宗教文化裡頭選，接得就係俄羅斯嗰自身文化裡頭嗰固有名。

爺名係一隻人佢屋裡爺嗰名字嗰根基，箇隻名字也會到所有嗰文件裡頭拕登記，佢永遠都位到名字嗰後頭。箇下子，爺名嗰後頭哈拕加嘍隻詞綴，男嗰嗰詞綴係-ович（-ovich），女嗰嗰詞綴係-овна（-ovna）。要係詞綴嗰前頭係隻й（y）或係隻軟輔音，佢俚會分頭變做-евич（-yevich）同到-евна（-yevna）。箇隻規律也有特殊情況。

ovich（-ovna）早以都係俄羅斯貴族用得嗰詞綴，一般人都係用-in、-yn、-ov、-ev（男嗰嗰詞綴）同到-eva、-ova、-ina（女嗰嗰詞綴）等等。末後19世紀開始，俄國沙皇搦ovich（-ovna）賜嘚一般嗰百姓，咁箇隻詞綴都變得全國通用嘍。

俄羅斯嗰夫妻之間會搦兩隻人嗰姓合做一隻姓，像老公Ivanov同嘚佢老婆Petrova嗰合姓就係Ivanov-Petrov或Ivanova-Petrova。俄羅斯嗰姓哈會根據人嗰性別區分陰陽性，像俄羅斯早先嗰總統Борис Ельцин（Boris Yel'tsin，波利思·葉津），佢嗰老婆就係Наина Ельцина（Naina Yel'tsina，奈娜·葉濟娜）。

俄羅斯嗰人名自身嗰順序係「名 + 爺名 + 姓」，但到正式嗰文件裡頭就係「姓，名 + 爺名」。正式嗰場合嗰時間，像采訪總統、稱呼上司就用「名 + 爺名」。

英語國家

詳細嗰內容請參照 en:First name、 en:Middle name、同 en:Last name

美國嗰《獨立宣言》裡頭John Hancock嗰署名

英語國家嗰人名基本上係三部分組成嗰，「首名 + 中名 + 尾名」（first name + middle name + last name）。尾名也有surname、family name嗰話法。

last name等同係「姓」，係通過父系血統傳承嗰。也有時間會搦爺娘兩隻人嗰姓連嘚一起做為細鬼嗰一隻合姓。middle name大多場合係可以拕省吥去嗰或略成佢嗰首字母大寫，佢通常也就一隻咁多。

西歐國家女嗰會等結婚後改做佢老公嗰姓。20世紀中期後，箇隻現象到美國一徑減少，蠻多女嗰到婚後都不改名嘍，或者夫妻雙方搦兩隻人嗰名字連到共用。

愛爾蘭

愛爾蘭人嗰名字可以係對一隻人嗰形容，像爺崽之間可以咁用：Óg係話「細」、Mór係話「大」，箇類次係拕擺到「名」跟「姓」嗰中間，像Seán Óg Ó Súilleabháin。Beag / Beg係話「小」，佢都替代得正Óg。一般咁叫嗰人不見得係身材碼子小。有時間毛伢子生下來丁丁子大嗰話，佢爺娘會叫佢beag，特別係爺娘冇結婚到10月就出生嗰細伢子。

愛爾蘭嗰姓裡頭，男仔子嗰姓要係Ó開頭，係話「某人嗰孫」；要係Mac開頭，係話「某人嗰崽」，像Ó Dónaill就係話「多納嗰孫」、Mac Gearailt係話「格奈嗰崽」。女仔子嗰話，Ó、Mac就拕換做Ní（Iníon Uí來嗰）、Nic（Iníon Mhic來嗰）。要係男女結婚後，老婆要換做老公嗰姓，Ó、Mac就會拕換做Bean Uí、Bean Mhic。箇裡頭嗰Bean係可以省吥嗰。

要係一隻姓嗰起頭係隻元音，許上頭嗰Ó類會到箇隻姓嗰牽頭加隻h，像Ó hUiginn、Ó hAodha。

德國

德國嗰人名係由一隻或多隻「名」（Vornamen）+一隻「姓」（Familienname）組成嗰。一般來話，德國細伢子一生下來就拕爺娘取嘍隻名。女仔子或天主教徒好少會取好幾隻名字。平常叫人用嗰名字係Rufname。

德國人嗰姓或族姓（Nachnamen）大多就一隻詞。早已貴族嗰姓都含有von（「嗰」嗰意思），箇下都全民化嘍。但平民用嗰貴族姓光拕國家法律認可，早已貴族組成嗰協會係不認可嗰。要係一隻貴族女嫁到一隻平民男，兩隻人都叫得正女方嗰貴族姓，箇係早已不拕容許嗰。

荷蘭

1811年以降，荷蘭引進大量嗰外姓，箇下荷蘭人有10萬多隻姓。荷蘭蠻多嗰姓牽頭都有隻前綴，像van（嗰）、de / het / 't （箇）、der（箇嗰）、van de（箇來嗰）、in het（箇裡頭嗰），像van Rijn係話「萊茵河來嗰」、de Wolf係話「箇隻狼」。一滴子動詞形式嗰姓後頭加上-en，就係話佢嗰工作，像van Bruggen係話「做橋嗰人」。

有van嗰人名可能係話佢屋裡早以可能係貴族，像van Tuyll van Serooskerken，箇都係到法國嗰de學來嗰。貴族嗰箇隻前綴永遠不大寫。

法國

法國人嗰名字可以有幾喇隻，但會有一隻係最常用嗰，盈下嗰名字都係到官方文件裡頭填嗰。咁西拉克只會拕叫做Jacques Chirac，不會係Jacques René Chirac。中間嗰名字大多都係公公婆婆嗰名字，故係箇下都不作興叫細伢子嗰中間名嘍。大部分名字係到天主教嗰聖人名錄裡頭揀嗰，常見嗰男仔子嗰名字係Jean、Jacques、Michel、Jean-Baptiste，常見嗰女仔子嗰名字係Marie、Jeanne、Julie。箇下哈作興取外國名，像Kevin、Enzo、Jessica、Sonia等等。

幾乎全部嗰法國名都係分做男名、女名嗰，但而今Dominique、Claude、Camille都做中性名使用。

根據法國統計局（INSEE）嗰話法，1891年到1990年，全法國登記到130萬隻姓，同時間有20萬隻姓消失。一般認為法國嗰姓嗰數量係100萬左右，別嗰資料哈估計50-80%嗰姓都係罕見姓。

法國嗰人名裡頭有隻冠詞de，佢通常表示特定嗰封建領土，也就係話許時間嗰貴族階級，像Louis, duc d'Orléans係話「路易，俄勒安嗰公爵」。有滴子含de嗰名字就不係貴族名，像法國先頭嗰總統Valéry Giscard d'Estaing，佢係1922年申請搦自簡嗰姓從Giscard改做Giscard d'Estaing，理由係話佢箇隻姓到法國大革命嗰時間就滅絕吥嘍。

法國大革命嗰時間，有滴子貴族怫自簡嗰名字惹禍，就搦許隻de舞吥嘍。末後，19世紀嗰時間又有有錢人去買貴族嗰標誌de，為到係裝假子自簡係貴族。

意大利

意大利嗰人名係由「名」（nome）同到「姓」（cognome）組成嗰。

男仔子嗰名字嗰詞尾通常係-o，少部分係-e、-i、-a。女仔子嗰名字嗰詞尾通常係-a，少部分係-e、-i。最作興嗰男仔子嗰名字係Giuseppe、Antonio、Giovanni、Francesco、Mario、Luigi；最作興嗰女仔子嗰名字係Maria、Anna、Rosa、Giuseppina、Angela、Giovanna。因為係羅馬帝國發源地嗰關係，意大利嗰人名有滴子係古羅馬嗰人名變來嗰，像Marco來自Marcus、Fabiano來自Fabianus、Orazio來自Horatius。

意大利嗰姓係世界上最多嗰，有35萬咁多。大部分意大利嗰姓嗰末尾都係i，箇係來自中古意大利語指明籍貫嗰習慣。像Ormanno屋裡嗰Filippo就會拕叫做messer Filippo degli Ormanni（俄瑪羅嗰菲利波先生）。

意大利嗰姓嗰牽頭加得一隻冠詞（il，元音前頭變做i），表示尊敬，像Mario Russo可以叫佢il Russo，或il Russo Mario，不可以係Il Mario Russo。貴族姓嗰牽頭永遠都冇冠詞，像Farnese、Cornaro。

西班牙

西班牙語國家嗰人都有一隻或多隻嗰名字，同到兩隻姓。一隻係爺姓（apellido paterno），一隻係娘姓（apellido materno）。一般叫人都係叫「名字 + 第一隻姓」。要係許隻姓非常普遍，就會用第二隻姓。第一隻姓一般都係爺姓。

西班牙語裡頭叫人，係：José Antonio Calderón Iglesias應該拕叫做「甲德郎先生」（Señor Calderón），不係「易勒謝先生」（Señor Iglesias）。佢佮嗰朋友一般就叫佢José Antonio或José。

葡萄牙

葡萄牙語國家嗰人也係有一隻或多隻嗰名字，同到兩隻姓。一隻係爺姓，一隻係娘姓。不過第一隻姓係娘姓，第二隻姓係爺姓，箇同西班牙語嗰習慣係反到嗰。社交或者學術嗰場合叫爺姓就做得。

人名嗰文化

撲克裡頭嗰「Joker」牌（王牌）

趙C，江西鷹潭人，1986年生人。
八曼·賓·蘇迫曼（Batman Bin Suparman），新加坡人，1990年生人。[1]
尤寧·肯達·伊西·艾特·斯迫薛·克（Urhines Kendall Icy Eight Special K），2003年生人。[2]
葛登白拉斯朵特感·室弗曼（GoldenPalaceDotCom Silverman），2005年生人。係家網上賭場GoldenPalace.com搦15199美金到特麗·伊利簡（Terri Iligan），讓佢改嗰名。
焦柯·阿羅約（Joker Arroyo），菲律賓人，1927年生人。佢係菲律賓嗰一隻政治人物。佢嗰名字Joker係撲克裡頭嗰大王。佢嗰兄叫Jack。
葛·薩姆葛（God Shammgod），美國人，1976年生人，籃球手。佢名字裡頭嗰God係英文嗰上帝嗰意思。
迪·亞斯曼（Dick Assman），美國人，1934年生人。佢係隻加油站嗰老闆。佢嗰名跟姓係話「卵 + 屎人」。
肯德基弗勒庫魯第.com（KentuckyFriedCruelty.com），美國人，1986年生人。佢係「好生對待頭牲組織」（People for the Ethical Treatment of Animals，PETA）嗰成員。佢不滿肯德基（KFC）舞死許多雞，故係搦自簡嗰名字換到箇隻名字，表示抗議。
普萊茲-葛巴勒邦（Praise-God Barebone），英國人，1598年生人。佢係賣皮革嗰，傳教嗰。
尼柯拉昂勒斯-耶穌-庫里斯特-哈-戴德-霍-第-杜-哈斯特-賓-答姆德巴邦（Nicholas Unless-Jesus-Christ-Had-Died-For-Thee-Thou-Hadst-Been-Damned Barbon），英國人，1640年生人。佢係經濟學家、物理學家。佢可能係Praise-God Barebone嗰崽。
孺賓（Brfxxccxxmnpcccclllmmnprxvclmnckssqlbb11116），瑞典人，1991年生人。佢爺娘幫佢取箇隻名字，末後冇拕批准，哈拕罰吥500喇美金。之後佢爺娘哈想叫佢「A」，也冇拕批准。
甲旦環達斯直華斯特單蘇迫曼斯派德曼八曼沃弗寧學岩德特弗拉細康拜德（Captain Fantastic Faster Than Superman Spiderman Batman Wolverine Hulk And The Flash Combined），英國人，1989年生人。
沃虎+585 聖聶（Wolfe+585, Senior），美國人，1904年生人。佢嗰名字係Wolfe加到585隻字母，係世界頭上最莽嗰名字。佢嗰全名係「Adolph Blaine Charles David Earl Frederick Gerald Hubert Irvin John Kenneth Lloyd Martin Nero Oliver Paul Quincy Randolph Sherman Thomas Uncas Victor William Xerxes Yancy Zeus Wolfeschlegelsteinhausenbergerdorffvoralternwarengewissenhaftschaferswessenschafewarenwohlgepflegeundsorgfaltigkeitbeschutzenvonangreifendurchihrraubgierigfeindewelchevoralternzwolftausendjahresvorandieerscheinenwanderersteerdemenschderraumschiffgebrauchlichtalsseinursprungvonkraftgestartseinlangefahrthinzwischensternartigraumaufdersuchenachdiesternwelchegehabtbewohnbarplanetenkreisedrehensichundwohinderneurassevonverstandigmenschlichkeitkonntefortplanzenundsicherfreuenanlebenslanglichfreudeundruhemitnichteinfurchtvorangreifenvonandererintelligentgeschopfsvonhinzwischensternartigraum, Senior」。

外部鏈接

東亞

江西嗰人名

日本嗰人名

朝鮮嗰人名

蒙古嗰人名

越南嗰人名

南亞

中南半島嗰人名

印尼嗰人名

印尼細伢子嗰名字

菲律賓嗰人名

印度嗰人名

西亞

阿拉伯嗰人名

伊朗嗰人名

以色列嗰人名

歐洲

俄羅斯嗰人名

愛爾蘭嗰人名

意大利嗰人名

法國嗰人名

西班牙嗰人名

葡萄牙嗰人名

法律認可嗰葡萄牙語名字

德國嗰人名

德國嗰人名一覽

荷蘭嗰人名

參考文獻

梁洪生，《考古資料中的唐以前江西姓氏考察》，1991年，《江西文物》第2期
張義達、張誠，《中國姓氏》，2002年，ISBN 7-5617-2769-0
王泉根，《中國姓氏的文化解析》，1999年，ISBN 7-80130-331-8
松本脩作、大岩川嫩，《第三世界の姓名人の名前と文化》，1994年，ISBN 4-7503-0579-0
朝日ジャーナル，《世界のことば》，1991年，ISBN 4-02-259536-1
東京外国語大学語学研究所，《世界の言語ガイドブック》，1998年，ISBN 4-385-35815-X
梅田修，《世界人名ものがたり―名前でみるヨーロッパ文化》，1999年，ISBN 4-06-149437-6
梅田修，《世界人名ものがたり―名前でみるヨーロッパ文化》，1999年，ISBN 4-06-149437-6
辻原康夫，《人名の世界史》，2005年，ISBN 4-582-85295-5
Simon & Schuster Macmillan，《"Naming" Encyclopedia of Marriage and the Family. David Levinson》，1995年