祠堂

祠堂係江西人同得東亞多數國家祭祀、供奉自簡屋裡先人嗰場所，係江西民居嗰核心部件，佢時常佔據嘚上好嗰風水意象地塊。到祠堂裡頭做嗰任何一隻活動都極其講究位序。祭祖嗰時間對過身嗰人嗰牌位嗰擺放位置、在生嗰人嗰企嗰位置都有嚴格嗰規定。

有滴子大型正式嗰祠堂，除吥祠主嗰牌位會拕擺嘚正中嗰神主龕上頭，另外邊上哈會有數量不等嗰「附享」牌主。成為「附享」牌主一般有兩隻標準：一係當官嗰、或對屋裡家族建設有特殊貢獻者，有時間「捐銀進主」嗰方式會拕採用，一隻人通過捐一定數量嗰白銀或田地到祠堂裡頭買到牌位。好似樂安嗰流坑董氏大宗祠，佢攏共有四進，裡頭含到寢室兩進，前一進寢室「敦睦堂」裡頭祀合族嗰歷代祖先；後一進寢室當心間係「孝敬堂」，祀仕宦；兩隻次間分頭係彰義堂同得「報功堂」、「彰義堂」祀許滴子捐錢捐田助建宗祠同得助祭地嗰族人，標準係十兩銀子一位。

行祭禮嗰過程中，具有不同輩分、隸屬不同房支、擁有功名、官爵同得冇功名、官爵嗰人要按照一定嗰順序企到，吉安一帶嗰宗祠裡頭相得到通過鋪地形式固定具體嗰企立點。