「中國嗰歷史」：修訂間差異

{{中國嗰歷史}}

有話法中國係[[四大文明古國|四大文明古國]]之一。到今吖為止全中國境內尋得到嗰最早古人類遺址，起碼有170萬年前咁久遠。中國歷史拕分做幾隻階段。通常當搦夏、商、周三隻朝代做奴隸社會時期，由秦朝到清朝就叫做封建社會時期，末後就係民國時期。

==史前==

[[Image:Longshan eggshell thin cup.jpg|thumb|left|龍山文化嗰子殼莽柄[[杯|鍴]]]]

[[元謀人|元謀人]]係尋到嗰中國遠古遺址中頂早嗰人類，離今大概178萬年。[[北京猿人|北京猿人]]就距今約四、五十萬年。

中國各史前文化，可以分做下首幾隻階段：

*舊石器時代早中期——以直立猿人為主，距今約50至40幾萬年前

*河套時期——舊石器時代中期，距今約20至10幾萬年前

*搦仰韶文化做代表嗰新石器時代中期

*搦龍山文化做代表嗰新石器時代晚期，係公元前2500年到公元前1300年

考古學研究得知，新石器時代嗰中國多元並立：約西元前5000年到3000年前嗰豫、冀南、隴南同到晉南出現用紅陶、彩陶，食粟，養家畜嗰仰韶文化；大約同期，浙江北就有河姆渡文化；山東有大汶口文化。

==神話傳說==

[[Image:Yellow Emperor.jpg|thumb|left|後人繪嗰黃帝像]]

神話話到中國頂早嗰領袖係[[三皇五帝|三皇五帝]]；但哪「三皇」、哪「五帝」其實冇有定論。一般話三皇係伏羲、神農、燧人；五帝係黃帝、顓頊、帝嚳、堯、舜。

如今作興嗰解釋，[[黃帝|黃帝]]原本係[[炎帝|炎帝]]部落一隻分支嗰首領，強大嘞後到阪泉之戰擊敗炎帝，成為新部落聯盟嗰首領。之後，黃帝又同東南首嗰蚩尤部落起衝突，接到到涿鹿徹底擊敗對方，成為霸主。

再後來，黃帝嗰孫子顓頊、同到曾孫帝嚳接到擔任部落聯盟嗰頭人。之後輪到帝嚳嗰崽堯繼位，佢係隻賢君，創立嘞禪讓制，傳位到舜。舜時，黃河泛濫，鯀想堵到箇條河，結果洪水反而更加厲害，咁鯀就拕斬殺。鯀嗰崽[[禹|禹]]改用疏導，成功治正嘞洪水咁，也就拕推舉為首領。有話法禹嗰崽啟伓想再禪讓，要自立為王。不管啷樣，啟建立嘞首隻王朝——夏朝。夏朝持續嘞四百喇年，到桀嗰末期，東方嗰商族首領成湯奪取政權，建立嘞商朝。

==先秦==

===三代===

[[Image:Shang_dynasty_inscribed_tortoise_plastron.jpg|thumb|甲骨文]]

頭隻朝代[[夏朝|夏朝]]，由大概前21世紀到前16世紀。由於箇段歷史冇有文字性質嗰文物印證，所以只能靠後世嗰記錄同到出土嗰文物互相對照考證。有嗰學者認為河南二里頭遺址可能就係夏朝嗰遺蹟，但有學者懷疑。據記載，夏朝有中國至早嗰曆法——夏小正。

末後嗰[[商朝|商朝]]，由前16世紀到大約前1046年，係目前尋到頭隻有文字文物嗰歷史時期。據話，夏朝最末一隻君主桀，荒淫無道就拕成湯造下臺。商代嗰文明相當來勢有曆法、青銅器同成熟嗰文字——[[甲骨文|甲骨文]]等。商朝已經有一套完整嗰國家組織，具有封建王朝嗰規模。許時間嗰主要生產部門係農業，但係手工業、特別係青銅器嗰冶鑄水平，已經都非常喫價。商代也出現嘞原始嗰瓷器。自盤庚就位之後，商朝就搦殷（今河南安陽）定為首都，故係商朝又叫殷朝。商朝嗰王位繼承制度係傳崽或者傳得老弟，大多揸得年紀嗰長幼繼承。

同時間，黃河上游嗰另一隻部落周正逐步興盛。大概前1046年，周武王討伐商朝嗰紂。周到牧野之戰獲得決定性嗰勝利，商朝也就滅亡。[[周朝|周朝]]正式建立，建都渭河流域嗰鎬京（今陝西西安附近）。之後，周朝嗰勢力又慢慢滲到黃河下游同淮河一帶。周王朝依舊係封建貴族統治，有好多貴族嗰封國。箇兮由貴族所管理嗰所在就叫諸侯國。周朝影響力最鼎盛嗰時間，甚至跨過長江、東北到今吖嗰遼寧、西到甘肅、東到山東。另外，周朝時間嗰宗法制度、政權機構都算完善。中國最早有確切時間嗰歷史事件，係公元前841年，發生嗰西周「國人暴動」。

===春秋戰國===

[[Image:Confucius 02.gif|thumb|先師孔子行教像，由[[唐朝|唐朝]]畫家吳道子所畫]]

前770年，周平王受到北方遊牧部落犬戎嗰威脅，就往遷都到黃河中游嗰洛邑（今河南洛陽），歷史學家搦箇段時期算東周嗰起頭。之後，周朝嗰影響力逐漸減弱，取而代之嗰係大大小小上百隻小國（諸侯國），史稱「春秋時期」。[[春秋|春秋]]時間嗰大國共有十幾隻，包括晉、秦、鄭、齊同到楚等。春秋時間社會動盪，戰爭不斷，先後有五隻國家稱霸，即齊、宋、晉、楚、秦（或齊、晉、楚、吳、越）。箇五國合稱「春秋五霸」。

到嘞前546年嗰樣子，黃河流域嗰爭霸基本結束，晉、楚兩國平分嘞霸權。前403年，晉國又拕分成韓、趙、魏三隻諸侯國，史稱「三家分晉」。再加上拕田氏搶掉嘞政權嗰齊國，同到秦、楚、燕，共稱「戰國七雄」，標誌到[[戰國|戰國]]時期嗰開始。到前356年，秦國商鞅變法開始，國力大大增強，最終到前221年消滅六國最後嗰齊國，完成統一中國。

春秋戰國時間嗰學術思想比較自由，佢也叫「百家爭鳴」。箇種氣氛造就嘞多位對後世有深遠影響嗰思想家，例如[[孔子|孔子]]、[[老子|老子]]、墨子、莊子、孟子、荀子、韓非等人，也叫「諸子百家」。眾多學術流派之中，比較出名嗰有十大家，即[[儒家|儒家]]（倫理）、[[道家|道家]]（自然）、陰陽家（星象占卜）、法家（法治）、名家（修辭辯論）、墨家（科技）、眾、雜、農家（農業）、小說家（小說）等。

文化方面，有頭隻以本名出現嗰詩人：[[屈原|屈原]]。佢嗰文學作品有《楚辭》、《離騷》等。孔子編正嘞《詩經》，也出現嘞《春秋》、《國語》、《戰國策》等嗰巨作。戰爭學方面出現嘞兵法家[[孫武|孫武]]、孫臏、吳起等。科技方面有墨子。建築方面有魯班，佢發明嗰瓦當奠定嘞中國建築技術嗰基礎。春秋戰國時期還有裝備精良嗰戰車同騎兵，發達嗰冶金術製造出精良嗰鐵器。農業上出現嘞各種灌溉機械，大大提高嘞生產率，奠定嘞之後人口膨脹嗰基礎。另外，對天文學同曆法研究方面，夏朝發明嘞干支紀年，還出現嘞十進位制。西周人就用圭表去測日影為到確定季節；春秋時間確定嘞二十八宿；後期則產生嘞古四分歷。

總之，中華文化嗰源頭基本上都可以到箇段時期度尋到。

===秦漢===

[[Image:Great Wall of China.jpeg|thumb|八達嶺長城]]

前221年，秦國消滅嘞別嗰六國，成為史上首隻統一中國嗰[[秦帝國|秦帝國]]，佢定都咸陽（今西安附近）。統一全國嗰嬴政覺得自家「功蓋三皇、德過五帝」，就改用「皇帝」稱號，自封「始皇帝」，人叫「秦始皇」。之後嗰皇帝叫二世，直到千世萬世。嬴政對國家進行嘞多項改革，包括確立中央集權制，取代周朝嗰諸侯分封制；統一嘞文字，方便官方行文；統一度量衡，方便工程計算。秦始皇還大力修築馳道，連接戰國時間趙、燕同秦國嗰北面圍城，築成西起臨洮、東到遼東嗰萬里長城，為到抵擋北方匈奴、東胡等遊牧民族嗰侵襲。秦始皇推崇法治，重用法家嗰李斯作丞相，下令焚書坑儒、收繳天下兵器，讓七十萬人修築阿房宮同自家嗰墓——包括兵馬俑等。

前210年，秦始皇出巡半中途病死，胡亥殺吥佢兄扶蘇即位，成為秦二世。但係十個月之後，陳勝、吳廣到大澤鄉揭竿而起、六國遺臣等也就乘勢作亂。到前206年，劉邦攻陷咸陽，秦王子嬰綁到自家出城投降，秦朝由此滅亡。

接到，漢王劉邦同西楚霸王項羽開展[[楚漢相爭|楚漢相爭]]。前202年，項羽到垓下（今安徽靈壁）拕漢軍圍困，到烏江割頸自刎，楚漢之爭到此結束。漢高祖劉邦登基，定都長安（今陝西西安），[[西漢|西漢]]開始。

到嘞漢武帝，西漢達到最鼎盛時期，聯同羅馬、安息、貴霜並稱四大帝國。武帝實行推恩令，徹底削減封國嘞勢力、強化監察制度、實現中央集權。佢派衛青、霍去病、李廣等軍將北征，成功擊敗匈奴、控制西域，又派張騫出使西域，開拓通到中東、歐洲嗰絲綢之路，發展對外貿易、促進中西文化交流。儒家學說最終確立為官方嗰主流意識形態。西漢還出現嘞首部通史性質嗰巨著《[[史記|史記]]》，造紙術接到推動別嗰文化藝術。

西漢發展到一世紀左右開始衰敗。公元九年，外戚王莽奪權，宣布一系列改革，又搦國號改為「新」。但箇兮改革都不切實際，最終扤得農民起義。公元25年，劉秀復辟漢朝，定都洛陽，史稱[[東漢|東漢]]、劉秀就叫光武帝。

東漢嗰發展延續嘞西漢嗰傳統，出現嘞發明渾天儀同候風地動儀嗰天文學家張衡。文化發展方面，東漢吸取嘞秦國嗰教訓，顯得相當開明。當時佛教通過西域到達中國，河南洛陽就修建嘞中國嗰首隻佛教寺廟——[[白馬寺|白馬寺]]，標誌到佛教正式傳入中國。

===魏晉南北朝===

[[Image:Chibi.jpg|thumb|赤壁]]

再到東漢中末期，宦官同外戚長期爭權，等黃巾起義後東漢再度衰敗。196年，[[曹操|曹操]]控制嘞東漢朝廷，搦漢獻帝帶到許都，「挾天子以令諸侯」。220年，曹操死後，長子曹丕廢吥漢獻帝自立為帝，建立魏國。連到有劉備嗰蜀國和孫權嗰吳國，中國進入[[三國|三國]]時期。

265年，魏國嗰司馬炎稱帝，建立晉朝。280年三國歸晉，再度統一。晉朝嗰文化有嘞一定發展。但許時間戰亂頻紛，好多士族選擇歸隱鄉間、不問世事，典型嗰就有[[陶淵明|陶淵明]]。290年，晉武帝死後冇一年，長達十六年嗰朝廷鬥爭開始，史稱「[[八王之亂|八王之亂]]」。與此同時，中原週邊嗰五隻遊牧民族（匈奴、鮮卑、羌、氐、羯）同各地流民暴動反晉，史稱「[[五胡亂華|五胡亂華]]」。箇兮遊牧民族先後建國，由304年到409年，中國北部陸續有多隻國家建立，包括嘞漢、前趙、後趙、前燕、前涼、前秦、後秦、後燕、西秦、後涼、北涼、南涼、南燕、西涼、夏和北燕，史稱十六國。

自東漢後期開始，北方嗰漢族為到躲避戰亂，大量搬往南方，經濟重心也就南移。晉朝南遷、建都建康（今[[江蘇|江蘇]][[南京|南京]]）之後，史稱前者做西晉，遷都後做東晉。末豚，拓跋鮮卑統一北方，建立北朝嗰首隻王朝——北魏，形成南北朝嗰對立。南朝經歷嘞宋、齊、梁、陳嗰更替，而北朝也有北魏、東魏、西魏、北齊同到北周。南北朝時期係[[佛教|佛教]]十盛行嗰時期，西方嗰佛教大師接連訪問中國，好多佛經翻譯成漢文。

===隋唐五代===

[[Image:Court Ladies Preparing Newly Woven Silk (捣练图) by Emperor Huizong (1082–1135).jpg|thumb|唐代畫家張萱嗰《搗練圖》]]

581年，楊堅取代北周建立嘞[[隋朝|隋朝]]，接到到589年消滅南朝最末一隻政權——陳。中國歷經嘞三百多年嗰分裂之後，再度統一。但隋朝係隻短命嗰王朝，到修築嘞京杭大運河修正之後，佢就滅亡嘞，共經歷嘞兩代37年。

618年，唐高祖李淵推翻隋朝，建立嘞[[唐朝|唐朝]]。626年，唐太宗李世民即位，佢嗰一系列政策讓唐朝進入最鼎盛時期，史稱「貞觀之治」。長安（今[[陝西|陝西]][[西安|西安]]）係當時世界上最大嗰城市，唐朝也係當時最發達嗰文明。七世紀末期，高宗李治嗰老婆[[武則天|武則天]]開始掌權，更加遷都到洛陽接到稱帝，成為中國史上唯一嗰女皇帝。武則天搦國號改成周，定佛教為國教。

隋唐創立嗰科舉制，係當時比較科學跟公平嗰人材選拔制度。唐朝同好多鄰國發展嘞良好嗰關係，文成公主嫁到吐蕃、帶嘞大批絲織品同手工藝品去。[[日本|日本]]接連派遣唐使、學問僧同留學生到中國。唐朝嗰文化發展鼎盛，特別係詩文得到非常大嗰發展，重編嘞大量紀傳體史書。唐代出現大批有名嗰文學家，像[[李白|李白]]、杜甫、白居易、杜牧等詩人，同到韓愈、柳宗元等散文家。佛教係唐朝最煬嗰宗教，玄奘曾遠赴天竺取經，回國後翻譯1335卷經文，到西安修建大雁塔存放佛經。唐朝頭期，朝廷對宗教採取寬容政策，除吥佛教，道教、摩尼教、景教連同伊斯蘭教都廣泛傳播。箇一切都到唐玄宗李隆基統治時期達到頂峰，史稱「開元盛世」。

755年，[[安史之亂|安史之亂]]爆發，唐朝開始走向衰落。875年，黃巢起義爆發，唐朝再度分裂，最後到907年滅亡，開始嘞[[五代十國|五代十國]]嗰混亂局面。

===宋元===

[[Image:清明上河图.jpg|thumb|180px|[[清明上河圖|清明上河圖]]局部]]

經過嘞五十多年嗰紛爭後，[[北宋|北宋]]到960年控制嘞中國大部分地區。但係燕雲十六州到北宋戰敗後就被割到北方契丹族建立嗰遼朝，河西走廊也拕黨項族建立嗰西夏佔據。北宋為到維持國家壽命，就向遼國和西夏交納歲幣。北宋晚期發生嘞分別以王安石、司馬光為首嗰黨派鬥爭，導致社會不安。到嘞1125年，松花江流域嗰女真族（即後來嗰滿族），建立嘞大金國、而勢力逐漸強大，最後消滅遼國。

金國仰上進攻北宋，1127年金國攻破北宋都城東京（今[[河南|河南]][[開封|開封]]），俘虜嘞三千多皇族，包括嘞當時嗰皇帝宋欽宗同太上皇宋徽宗。箇年係靖康年，所以北宋滅亡就史稱「靖康之變」。同年，宋欽宗嗰細弟趙構到南京（今河南商丘）即位，定都臨安（今[[浙江|浙江]][[杭州|杭州]]），史稱[[南宋|南宋]]。

此後，金跟南宋多次交戰，南宋屢戰屢敗；一逕到1234年，蒙古滅金。蒙古之後又同南宋經歷嘞多次戰爭。1271年忽必烈建立[[元朝|元朝]]，定都大都（今[[北京|北京]]）。元軍到1279年同南宋進行崖山海戰，八歲嗰小皇帝趙昺拕元軍逼得走投無路，結果到今吖香港嗰屯門附近跳海自殺。崖山海戰以元朝勝利、南宋滅亡而結束。

北宋期間出現嘞印刷術同火藥。箇時間中國經濟發達，海上貿易興旺，[[福建|福建]]嗰泉州一帶全係繁華嗰港口。中國嗰經濟總量還係許時間全世界嗰一半，首都開封同杭州人口達到四五百萬。各國商人雲集、文化上又出現嘞程頤、[[朱熹|朱熹]]等理學家，提倡「三從四德」，漢族女人要紮腳嗰陋俗也一併產生。同唐詩並駕齊驅嗰宋詞，有[[蘇軾|蘇軾]]等詞人，同中國史上最出名嗰女詞人[[李清照|李清照]]。另一方面，還出現嘞《白蛇傳》、《梁祝》等浪漫愛情傳說，宋朝也拕稱為中國嗰「文藝復興」。

元朝建立之後，一方面吸收嘞好多中原、漢族嗰文化，使用中原嗰統治機構同方式。元朝還大力宣揚朱熹嗰理論，扤得程朱理學成為許時間甚至後代嗰官方思想。另一方面佢又實行民族等級制度，第一等係蒙古人；第二等係「色目人」，包括原本西夏統治區同到西域、中亞等地嗰人；第三等係「漢人」，包括原本金統治區嗰漢族、契丹、女真等族人；最豚第四等係「南人」，包括原南宋統治區嗰漢族同別族嗰人。箇種民族制度導致漢族不滿，伓少漢人搦元朝看成外來政權，發生多次反抗。元朝除吥傳統嗰農業外，也好重視商業。元朝首都大都十分繁華，各國商人雲集。文化上出現嘞同唐詩、宋詞並稱嗰元曲，包括諸如關漢卿、馬致遠、王實甫等著名作曲家。

===明清===

[[Image:GuGongRichyLi.jpg|thumb|[[紫禁城|紫禁城]]嗰太和殿]]

1368年，農民起義軍領袖朱元璋推翻嘞元朝，建立[[明朝|明朝]]，前期建都南京。1405年，鄭和七下西洋，到過印度洋、東南亞同非洲等地；伓過接到明朝就逐漸閉關鎖國。1421年，明朝遷都北京。明朝文化上出現嘞王陽明、李贄等思想家，同《三國演義》、《水滸傳》、《西遊記》、《金瓶梅》等長篇小說。明朝末年皇帝荒淫無道、加上宦官亂政，1627年爆發明末農民大起義；1644年起義嗰首領[[李自成|李自成]]攻剋北京，明思宗上吊自殺，明朝滅亡。南方大臣接連擁護福王朱由崧（弘光）、唐王朱聿鍵（隆武）、桂王朱由榔（永曆）做皇帝，史稱南明，但最終因為實力不足加上政治內鬥，就拕箇時間嗰清朝所滅。

明朝晚期，住到東北地區嗰滿族開始興旺，到1644年李自成攻剋北京後冇幾久，就驅逐李自成，建立[[清朝|清朝]]。箇時間明朝舊臣鄭成功撤到臺灣島，驅逐嘞當地嗰荷蘭殖民者，後來也拕清朝攻陷。清朝到之後嗰半隻世紀成功征服嘞許多地方，像新疆、西藏跟到蒙古。康熙年間，清廷同沙俄到黑龍江地區發生戰爭，最終簽訂停戰條約《中俄尼布楚條約》。清朝取消嘞人頭稅，人口大增；19世紀嗰清朝人口佔到世界總人口嗰三分之一。箇時間進農業也興旺，清朝成為世界強國，1820年經濟總量佔世界嗰三分之一。

到嘞19世紀初，清朝開始走向衰落。嘉慶年間先後爆發白蓮教、天理教嗰大規模起義。而箇時間歐洲嗰海上強國[[英國|英國]]、荷蘭同葡萄牙等接連開始強制中國同佢俚貿易。1787年英國開始賣鴉片到中國，導致中國嗰國際貿易由順差變為巨額逆差。清廷到1815年頒布搜查洋船鴉片章程，但係英國無視禁令、繼續走私大量鴉片，扤得道光皇帝派林則徐到[[廣州|廣州]]禁煙。1839年6月，林則徐到虎門搦237萬斤鴉片儘數銷毀，史稱「虎門銷煙」。因為咁英國政府就到1840年6月發動第一次鴉片戰爭，標誌中國近代史嗰開始。

===近代===

鴉片戰爭持續到一年後，1841年8月英軍抵達南京，清廷怫英軍會進攻北京，立馬求和。1842年8月29日，兩國簽署《南京條約》，割讓香港島，開放[[上海|上海]]、[[廣州|廣州]]、[[廈門|廈門]]、福州同寧波作為通商口岸，還要賠償款銀（西班牙銀圓）2100萬元。之後1844年，[[美國|美國]]同[[法國|法國]]分別同清廷簽訂《望廈條約》同《黃埔條約》。

箇時間中國國內反抗清朝嗰鬥爭接到再度興起。1851年到1864年，受基督教影響嗰洪秀全建立嘞拜上帝會，發動金田起義、創建[[太平天國|太平天國]]。太平天國曾一度佔據南方部分省份，定都改名叫「天京」嗰南京，並建立政教合一嗰中央政權。別嗰運動還有天地會、捻軍、上海小刀會起義、甘肅回民起義等。箇兮反清鬥爭直到1860年代才基本安定。

19世紀後期，英、美、法、俄、日等國多次侵入中國，強迫清廷簽定更多不平等條約。1858年，中俄簽定《璦琿條約》，俄國割走黑龍江以北、外興安嶺以南60喇萬平方公里嗰土地。1860年，英法聯軍發動第二次鴉片戰爭，侵入北京，皇家園林圓明園拕搶掠焚燒，接到到1860年同清廷簽定《北京條約》，清廷要分別賠償800萬両白銀。同年，中俄《北京條約》搦烏蘇里江以東，包括庫頁島、海參崴約40萬平方公里嗰中國領土劃歸俄國。1864年《中俄勘分西北界約記》搦巴爾喀什湖以東、以南同齋桑卓爾南北44萬平方公里嗰中國領土，割到俄國。

[[Image:china_imperialism_cartoon.jpg|thumbnail|200px|1890年代法國嗰政治漫畫，描繪英、德、俄、法、日嘗試瓜分「Chine」（中國）箇塊大餅，後首嗰中國官員阻止伓正。]]

為到增強國力、鞏固國防，清朝由1860年代開始洋務運動，國力稍為恢復，出現嘞「同治中興」嗰局面。清軍到1877年收復新疆；又通過《伊犁條約》收復拕沙俄佔據多年嗰伊犁。中法戰爭後，清朝還建立嘞箇時間話係亞洲第一、世界第六嗰海軍艦隊北洋水師。

1894年爆發中日甲午戰爭，清朝戰敗，第年同日本簽定《馬關條約》，賠日本兩億両白銀，還要割[[臺灣|臺灣]]、澎湖列島到[[日本|日本]]。1898年，光緒帝等親政後同意康有為、梁啟超等人嗰變法主張，由6月11日到9月21日嗰一百〇三日進行嘞多項改革，稱為「[[百日維新|百日維新]]」。最終拕慈禧太后發動政變後失敗落幕，康有為、梁啟超逃到國外，譚嗣同、劉光第等六人被殺，史稱「戊戌六君子」。

1899年，義和團運動爆發，佢以「扶清滅洋」為口號，受慈禧默許下圍攻外國駐北京使館。各國就以解救駐京使館人員嗰名義進入中國，史稱八國聯軍。1901年清政府被迫同各國簽定辛丑條約，賠四億五千萬両白銀，分三十九年還清，本息合計九億八千萬両。同時，北京到山海關嗰鐵路沿線由各國派兵駐紮，開闢北京東交民巷做使館區，中國人不得入內。

===近現代===

[[Image:Sun Yat-sen 1924 Guangzhou.jpg|thumb|left|孫文]]

1901年，革命黨開始興起。[[孫文|孫中山]]等人到海外籌款指揮國內多次起義運動。經過十次起義失敗，同革命黨冇溝通正嗰湖北新軍到1911年嗰武昌起義成功。1912年正月，[[中華民國|中華民國]]宣告成立，孫文就任臨時大總統。孫文以清帝退位，仰上辭掉總統位置為條件，由[[袁世凱|袁世凱]]接任，但係袁世凱想恢復帝制，孫文發動護法運動同護國運動討伐袁世凱。1916年，袁世凱稱帝八十三日後病死，中華民國進入由北洋軍控制中央政府統治嗰時期，箇時間地方政府分別由各軍閥派系佔據。

孫文之後試圖聯合南方軍閥，北伐北京，但冇成功。1921年，由共產國際嗰指導嗰[[中國共產黨|中國共產黨]]成立，成為共產國際中國支部。1924年，孫文提出新三民主義，確定聯俄聯共、扶助農工嗰政策。國民黨改組，共產黨員以個人身份加入國民黨，箇係國共兩黨進行首道合作。

孫文建立廣州軍政府後，接連三次北伐，但都因為條件伓正就冇成功。1925年春天，孫文病死到北京。同年，廣州國民政府為統一跟到鞏固廣東革命根據地，先後舉行第一次東征、第二次東征同南征，肅清廣東境內嗰軍閥勢力同反革命武裝，搦廣東境內傾向革命嗰軍隊統編為國民革命軍，準備[[北伐|北伐]]。

1926年6月5日，國民黨中央執行委員會正式通過國民革命軍出師北伐案，任命蔣中正做軍總司令，正式北伐。但隨到北伐同國民革命嗰深入，國民黨再忍伓住共產黨嗰革命運動，國共兩黨接到分裂。大量共產黨員同佢嗰支持者拕清出國民黨。1927年8月1日，以周恩來、葉挺為首嗰共產黨員到[[南昌|南昌]]發動[[南昌起義|南昌起義]]，共產黨也就擁有自家嗰軍隊，佢接到到[[瑞金|瑞金]]建立嘞首隻紅色蘇維埃地方割據政權。南京國民政府先後對蘇區進行五回圍剿。1934年開始，紅軍轉移戰略，到貴州遵義確立嘞毛澤東對紅軍嗰領導權、指揮權，紅軍途經江西、貴州、四川、甘肅、陝西等省，經過二萬五千里長征，最末到陝西北部同陝北紅軍劉志丹部會師，建立陝甘寧革命根據地。

[[Image:Mao proclaiming the establishment of the PRC in 1949.jpg|thumb|毛澤東到[[天安門|天安門]]城樓上宣布[[中華人民共和國|中華人民共和國]]成立]]

1931年9月18日，日本由九一八事變開始侵華，佔領東北全境。1936年12月12日，國共發生[[西安事變|西安事變]]後第二道合作抗日。1937年7月7日，[[抗日戰爭|抗日戰爭]]全面爆發，蔣中正到廬山發表演說，號召全國人民一致抗日。日軍進行[[南京大屠殺|南京大屠殺]]前夕，中華民國首都從南京搬到武漢，接到搬到重慶；八年間以蔣介石為統帥嗰抗日軍隊共進行嘞二十二回大會戰，同成千上萬回嗰大小戰鬥。1945年，[[第二次世界大戰|第二次世界大戰]]結束，國民政府從日本手上收回臺灣、澎湖列島以及別嗰領土，但到1946年同蘇聯簽訂嗰條約中承認[[外蒙古獨立|外蒙古獨立]]。

1946年6月，[[國共內戰|國共內戰]]爆發。中國共產黨最後到1949年奪得全國政權，中華民國政府遷到光復後嗰臺灣。[[中華人民共和國|中華人民共和國]]到北平成立，並搦北平改為北京，毛澤東宣布中華人民共和國政府係包括臺灣在內嗰全中國嗰唯一合法政府。與此同時，蔣介石宣布臺北係“中華民國”臨時“首都”，宣誓三年之內反攻大陸，兩岸分裂局面由此開始。

{{stub}}

#徐中約：《中國近代史(上冊)》，香港：中文大學出版社，2001年，ISBN 9622019870

# Korotayev A., Malkov A., Khaltourina D.，''Chapter 2: Historical Population Dynamics in China''，載 ''Introduction to Social Macrodynamics: Secular Cycles and Millennial Trends''，莫斯科：URSS，2006年，ISBN 5-484-00559-0 .

==外部連結==

*[http://www.china10k.com/simp/history/ 中華萬年網]

*[http://cn-history.net/bbs/ 中華歷史網論壇] 一個全面專門研究中華歷史嘅論壇

*[http://wordpedia.pidc.org.tw/Content.asp?History=C1&Query=11 中國歷史概述]，載《[[中國大百科全書|中國大百科全書]]》

{{commons|History of China|中國歷史}}

[[simple:Ancient China]]

[[Category:中國嗰歷史]]