東南互保係話清末嗰義和團運動嗰時間，中國東南各省相互聯合、一道哩違抗中央政府嗰命令、拒絕同外國開戰嗰一場事。箇也係中國近代以降首回大規模嗰地方-中央衝突，咁都係末後東南各省「聯合自治」嗰濫觴。
出事嗰時間，兩江總督劉坤一、湖廣總督張之洞、兩廣總督李鴻章、鐵路大臣盛宣懷等人位到保存中國東南社會、經濟嗰穩定，等清朝對世界十一隻國家同時間宣戰之後，東南諸省（即江西、江蘇、安徽、湖北、湖南、廣東、廣西、福建、浙江、四川同到山東）仰上同外國參戰列強簽下協議，話清廷嗰詔令係「亂命」。李鴻章就話「無論北方情形如何，請列國勿進兵長江流域與各省內地；各國人民生命財產，凡在轄區之內者，決依條約保護。」
